Պացիենտների համար / Հիվանդություններ / Խուսափեք շփվել գրիպով հիվանդ մարդկանց հետ

Ջերմաստիճանի կտրուկ նվազմամբ պայմանավորված՝ աճել է վիրուսային հիվանդությունների թիվը։ Գրիպը նշյալ վիրուսներից ամենատարածվածն է։ Գրիպը վերին շնչուղիների սուր ռեսպիրատոր ինֆեկցիոն հիվանդություն է։ Ընթանում է էպիդեմիայի եւ պանդեմիայի ձեւերով՝ աշնան-ձմռան ամիսներին։

Բացահայտված է այս վիրուսի մոտ 2000 տեսակ։ Հիվանդությունը ծանր են տանում մանկահասակ երեխաները, մեծահասակները, հղիները, ինչպես նաեւ այն մարդիկ, ովքեր ունեն սրտի եւ թոքերի քրոնիկ հիվանդություններ։

Վարակը տարածվում է օդակաթիլային եղանակով։ Գրիպի գաղտնի շրջանը տեւում է մի քանի ժամից մինչեւ 2-3 օր։

Հիվանդության աղբյուրը վարակի կրողն է՝ հայտնի կամ թաքնված ձեւով։ Հիվանդը շրջապատի համար մնում է վրակիչ հիվանդոթյան առաջին ժամերից մինչեւ 5-7 օրվա ընթացքում։

Գրիպը արտահայտվում է բարձր ջերմությամբ՝ 38-40°C, սրտխառնոցով, գլխացավով, մկանային ցավերով, ընդհանուր թուլությամբ եւ քթում ու կոկորդում արտահայտված չորությամբ։

Գրիպից առողջանալը հեշտ է, եթե այն գտնվում է թեթեւ կամ սկզբնական փուլում։ Այս դեպքում կարելի է ապաքինվել 5-6 օրվա ընթացքում։ Հիվանդության բարդացած դեպքերը բավականին երկար ժամանակ են պահանջում՝ առողջանալու համար։

Գրիպի բարդացած փուլում կարող են զարգանալ․

• թոքաբորբ,
• քթի հարակից խոռոչների բորբոքում,
• մենինգիտներ,
• էնցեֆալիտներ:

Բուժումը պետք է կազմակերպել բժշկի հսկողությամբ։ Անկողնային ռեժիմը խիստ անհրաժեշտ է։ Ցանկալի է մեծ քանակությամբ հեղուկների ընդունումը։

Հիվանդության կանխարգելման կարեւորագույն  միջոցներից է գրիպով հիվանդների հետ չշփվելը։

Աննա Հովհաննիսյան
Գյումրի բժշկական կենտրոնի թերապեւտ